Radio Classic

«Classic» радиосының негізгі идеялық рухани дем берушісі - Қазақстан Республикасының Халық әртісі - Жәния Әубәкірова.

Шығармашылық ұжымның директоры - өнертану ғылымдарының кандидаты, іскерлік әкімшілік магистрі, Жұманиязова Раушан Кеңесқызы. Білікті басшының ұйымдастыруымен «Classic» радиосы, Ресейдің Радио “Орфей”(Мәскеу), BR-Klassik (Германия, Мюнхен), BBC3 (Ұлыбритания, Лондон), KUSC ( АҚШ, Лос-Анджелес) сияқты беделді радиостанцияларымен ынтымақтастық байланыс орнатқан.

«Classic» радиосының мақсаты - тарихта қалған және қалатын мәдени құндылықтарды дәріптеп, классикалық музыканың мол қазынасын тыңдарманның рухани азығына айналдырып, музыка әлемінің ғажайып тілін ұғындыру.

«Classic» радиосының негізгі міндеттері:

- Радиотыңдаушылардың мәдени және эстетикалық сұраныстарын, талап-тілектерін қамтамасыз ету;

- Бірнеше ғасырлар бойы сақталып келген музыкалық өнердің үздік үлгілеріне аудиторияның еркін қолжетімділігін қамтамасыз ету;

- Классикалық музыканы дәріптеу және насихаттау;

- Отандық композиторлар мен орындаушыларды қолдау және дәріптеу;

- Мәдени-танымдық және музыкалық білім берудің бірегей бағдарламаларын жасау.

«Classic» радиосы толығымен сандық спутниктік байланыс арқылы 18 сағат бойы үзіліссіз хабар таратуға бейімделген. Күн сайын қазақ және орыс тілдерінде, Қазақстанның және шет елдердің мәдени жаңалықтары тікелей эфирден таратылады.

Бүгінде «Classic» радиосының эфирі эксклюзивті танымдық-музыкалық бағдарламалармен толығып келеді.

«Киноблюз», «Диалог», «Классикомания», балаларға арналған қазақ және орыс тілді «Музыкалық Одиссея», «Культурная мозаика с Жанией Аубакировой», «Грани», «Jazz Time», «Тылсым перне», «Игра в бисер с Нургуль Ертаевой», «Арнайы шығарылым» бағдарламалары тыңдарманның рухани қазынасына айналды. Бұл - «Classic» радиосының төл өнімдері.

«Classic» радиосында Құрманғазы атындағы Қазақ Ұлттық консерваториясының түлектері, өнертанушылар мен кәсіби музыканттар қызмет атқарады. Бағдарламалардың мазмұнды, сапалы және көркем болуы шығармашылық ұжымның еселі еңбегінің жемісі.

2013 жылы Лондонда «Classic» Радиосының «Классикомания» бағдарламасы «AIBs Inspiring Creativity Awards» телерадио хабарларын тарататын халықаралық ассоциациялар байқауында көңіл сергітетін, білім беретін, біртума бағдарлама ретінде арнайы дипломмен марапатталып лауреат атанды.

2013 жылы Fashion TV Awards рәсімінде «Classic» радиосына «За то, что не выходит из моды» сыйлығы тапсырылды.